قصة خادم اهتم بخدمتة

marmar الجمعة نوفمبر 30, 2007 1:55 pm

النهارده عايز احدثكم عن محاربة الشيطان عشان يبعدنى عن خدمتى ولكن مش مكفيه انا لا عايز يبعد طفل مالهوش زنب غير انى خادمه اللى بيمشى على عكاز تعالوا معى نشوف الحكاية

نزلت الخدمة وانا طالب فى اولى ثانوى تقريبا عام 72 وفات شهرين وكنت فرحان قوى بخدمتى وفرحتى اكتر انى بخدم يسوع وانا بهذه الحالة

وفى يوم من ايام خدمتى كان فيه طفل شقى شويه وظروفه فى البيت صعبة ( هاكلمكم عنها بعد شويه ) وفجاءة قالى بعد اذنك يا استاذ عايز اروح اشرب قولت له استنى دقيقتين هانخلص ونروح كلنا نشرب الولد ماعجبهوش الرد فقام زقنى بشدة فوقعت على الارض وقالى لما اقولك عايز اشرب ترد تقولى حاضر والولد خد بعضه وطلع يجرى خاف لحسن اى خادم ينهره او يضربه او يعاقبه 0

ماكدبش عليكم الدمعة نزلت من عينى المهم قمت ونفضت هدومى وكملت الدرس وكان شىء لم يحدث واليوم انتهى وتعبت نفسيا جدا وطبعا كنت لسه حديث فى الخدمة وافكار كتير كانت بتدور فى راسى حول تركى الخدمة ومش رايح تانى وفى يوم السبت - تانى يوم - ذهبت الى الكاتدرائية القديمة فى كلوب بك اقابل اب اعترافى وكان فى ذلك الوقت ابونا بيسنتى السريانى ( الان الانبا بيسنتى اسقف حلوان والمعصرة ) وحكيت له على الموقف فقالى دى محاربة من عدو الخير ليك وللطفل المخدوم ارجع خدمتك واوعى تفكر انك تسيبها ولازم تروح تفتقد الولد اللى وقعك فسمعت لنصيحة اب اعترافى وذهبت للطفل افتقده الولد اول ما فتح الباب ولاقانى واقف قدامه قفل الباب فى وشى خبطت تانى المرة دى فتحت والدته الباب ودعتنى للدخول قعدت حوالى 10 دقائق والولد خايف يقابلنى فسالت والدته عنه فاجضرته وبصيت فى وش الولد لقيته مصفر وجسمه بيتنفض وخايف افتكر انى جاى اشتكيه لابوه او لامه عشان يعاقبوه
ولكن الولد اتفاجا قعدته جنبى وطبطبت عليه اطمنه انى مش جاى اشتكيه انا جاى اقوله ان العكاز اتزحلق على الارض قبل مايزقنى يوقعنى وهو مالهوش زنب الزنب على العكاز اللى اتزحلق ووقعنى0 ونزلت بعد ما وعدنى انه هايجى الجمعة اللى جاية 0
المهم الولد فعلا جه فى مدارس الاحد ولكن كان فى منتهى الشقاوة والمشاكسه وبيتصرف تصرفات غريبه فقررت ان ازوره انا وزميلى الخادم الذى يخدم معى فى نفس الفصل ( هو الان كاهن ) المهم وجدنا مفاجاة ان الولد عايش فى جو مكهرب الاسرة عايشه فى مشاكل وبعيده كل البعد عن الكنيسة وهذا الطفل اصغر افراد تلك الاسرة الكل بيضرب فيه وبيهينه وبيجى الكنيسة يفرغ الكبت والكابة بتاعة طول الاسبوع
فعشان افرغ تلك الشحنة الموجوده عند الولد فرغتها فى حاجة مفيده كل اسبوع اهد حيله فى الفصل اقوله قوم وزع كتب الترانيم شوية خد الغياب شوية تانى وزع الصور لغاية ما نيجى لتهاية يوم الخدمة الولد يروح مهدود حيلة والولد شعر بقيمته واهميته فى الفصل ولم اكتفى بهذا فكل يوم خميس انزل انا والولد افتقاد نفتقد الاطفال اللى ماجوش الاسبوع اللى فات
اما عن اسرته فابلغت امين الخدمة ( هو الان كاهن ايضا )لكى يتولى خدمة تلك الاسرة وقدر بنعمة المسيح ان يجذب جميع افراد تلك الاسرة للكنيسة والتصقوا بها التصاق شديد
مش هاتصدقونى ان هذا الطفل هو الان طبيب اسنان
فى الحقيقة لغاية دلوقت مس عارف هل هذا التصرف الذى حدث من هذا الطفل هو تدبير الهى عشان ازوره واعرف ظروفه اسرته البعيده عن الحظيرة وابلغ امين الخدمة لكى يفتقدها ويجذيها للحظيرة ام هى كانت محاربة شيطان لكى يبعدنى عن خدمتى ويبعد الطفل عن حضن كنيسته
فى النهايه اقدر اقول ان كل الاشياء تعمل للخير للذين يحبون الرب 0